X
تبلیغات
وبلاگ شخصی اکبر زواری رضائی - فاطما گولون سوچو نه؟

دوشنبه بیست و نهم فروردین 1390

فاطما گولون سوچو نه؟

 دومان اردم

 هر بیر مدنیتی قادینلارا داورانیشلاریندان تانیماق مومکوندور .(جک لندن)

 بری باشدان دئییم تئلی سریاللارا باخماقدان کسینلیکله زهلم گئدیر. همیشه گئدیب الله جانیما دئیمه سه عؤمرومون قالان بؤلومونو ده بو یؤنده سونا چاتدیریب واختیمی سریاللارین الیندن ایکی اللی قورویاجاغام. آنجاق جانیم سیزه دئسین بیر نتچه سوره بوندان اؤنجه تورک کاناللارینین بیرینده محتشم یوز ایل آدلی بیر سریالین آنونسونو گؤردوم. دوغروسو سریالین عثمانلی تاریخی حاققیندا چکیلدیی اوچون اونو سئیر ائتمه یه گئت- گئده ایچیمده اولان ماراق چوخالماغا باشلادی. ای بینوا باشی باتمیش من عثمانلی پادشاهی سولطان سولیمان قانونینین اؤزل حیاتی قونوسوندا چکیلمیش سریالین آز مدت سونرا سیاسی- اجتماعی پولئمیکایا چئوریله جه یینی هارادان بیله یدیم. سن دئمه توربادا پیشک وار. همیشه یاییندا اولان گیج- گیج عاشقانه سریاللاریلا آدی چکیلن سریالین ائششه گیده بیر قازاندا قاینامازمیش. سریال سولطان سولیمان قانونینین حرمسرادا یاشایان دؤرد رسمی،نیکاهلی قادینیندان دولایی باشقا بیر روملو قیزلا عشق ماجرالاریندان سئکسووال حیاتلاریندان دانیشیر. آخی بیلیرسینیزمی شریعتین یاسالارینا گوره هر بیر موسلمان کیشی یالنیز دؤرد قادینلا عینی زاماندا ائولیلیک حیاتی سوره بیلر.والسلام. دئمه لی شریعت بایراغینی دالغالاندیران اؤزونو ایسلامین قیلینجی دییه دونیایه تانیتدیران عثمانلی پادیشاهی یاواشجا، خیمیر- خیمیر شریعت قانونلارینی چئینه ییب توپورورموش. واخسی. سریالین بیرینجی بؤلومو یایینلاندیقدان همن سونرا mhp پارتیاسینین تملچی بوروکراتلاری اللرینی قالدیریب اولجه دیزلرینه سونرادا تپه لرینه دؤیدولر. های- هارای دوشدو : ای اهل موسلمان گلین آماندیر سولطان سولیمان الدن گئدیر. تورک تاریخی آشاغیلانیر یازیق اولدوق دییه باغیرا- باغیرا محکمه سالونونا تپیلدیلر. سریالین سئناریستی حاقدا محکمه یه شیکایت عریضه سی تقدیم ائتدیلر. صوحبتیمیزی بورا قدر یادینیزدا ساخلایین.  

بیر سورغو : سیزجه عثمانلی امپراطورلوغونون چؤکوش ندنی ساده جه فیریلداق آوروپالیلارین گیزلی جیجی- باجیلاری، اویونلاری هابئله حربی یوروشلریله می ایلگیله نیر؟ یوخسا بونون باشقا ندنلریده وار؟ آی برکه الله . گئتدیکجه قونوموزون آنا چیزگیسینه یاخینلاشیریق.دونیا شهرتلی آلمان فیلوسوفو نیچه اؤز چاغینین بوتون پلاتونیک دوشونجه لرینه قارشی دئکادانس قونوسونو اعتیراض سیمگه سی اولاراق قالدیردی. نیچه یه گؤره پلاتونیک دوشونجه لر فوندامئنتال اوصوللارینی برک- برک دوتاراق اؤز استاتیک اؤزللیکلریندن هئچ بیر زامان ال اوزه بیلمیرلر. ائله اولدوقلاری کیمی ده قالیرلار. آنجاق بونون ترسینه اولاراق وارلیق، انسان، دئییشکن دیر. هرشئی دئییشیر نیچه نین دیلی ایله دئسک دئشمک اؤزوده دئییشر. سونوجدا اؤز دئییشمزلیینی قورویان یئنی اینسان و حیات دیرلری هابئله ایلگیلردن دوغولان تپکیلره قارشی یئنی تئزلر اوره ته بیلمه ین هر بیر قورولوش و مدنیت دئکادانس ویروسونا یولوخاجاقدیر. دئکادانس لاتینجه چؤکوش آنلامینا گلیر. قارداش تورکلر بو سؤزه قارشیلیقلی یوزلاشما تئرمینینی قولانیرلار. سیزجه نیچه باتی مدنیتینین چؤکوشونون ندنلرینی آختاردیغی زامانلاردان عصرلر کئچدیکدن سونرا بیز اوچونجو دونیا انسانلاری کئچمیشیمیز حاقدا بیلگیلر الده ائتمک اوچون چابالاریمیز دوزگون ساییلماز می؟ بیز آتالاریمیزی تنقید ائتمک له اونلارین یاخشی عمللرینی اؤپوپ گؤز اوستونه قویمالی، پیس عمللرینی ایسه گؤتلرینه بیر تپیک توللامالییق.دولایی سیلا بیز گله جکده کی اؤلادلاریمیزین کئچمیشییک. بئله لیکله اونلارین بیزی تنقید ائتمه لری اوچون یوللاری هامارلایا بیلریک. سؤزوموزو اوزاتمادان فئودال گلنکلره باغلی قالان آتالار یادیگاری آتالار سؤزونه باش چکک. اونجه بونو دئمه لییم آتالار سؤزو تئرمینی لاپ اوره یی می بولاندیریر. نه اوچون آنالار سؤزو اولماییب؟ آی ساغ اول. بیز آذربایجانلی لارین تاریخی بیلینج آلتی گؤزلجه سینه گؤز اؤنونه سریلیر. یوخ بو دئییم اؤز تکلییینده منی قانع ائتمه دیی کیمی سیزی ده ائده بیلمز. اوزامان گلین بیر نئچه آتا سؤزونو اوخویوب فاکتیمیزی داها گئرچک لشدیرمه یه چالیشاق

 

1-   اوغلان اؤوه نکدیر، قیز دؤیه نک

 

2-   قیزینی دؤیمه ین دیزینی دؤیر

 

3-   آتین پیسدیرسه سات، آروادین پیسدیرسه بوشا.

 

4-   آتلا آرواد آمانت اولماز(اونلارجا آتالار سؤزونده آتلا آرواد سؤزو عین دیرده ایشله نیر.

 

حتی دده قورقود کیتابیندادا بو حال چوخ کؤتو دورومدا وورغولانمیشدیر یازیقلار اولسون.

 

خان بایندر ایلده بیر کره طوی ائدیب اوغوز بگ لرین قوناقلاردی.

 

- کیمین کی اوغلی – قیزی یوق، قره اوتاغا قوندورون،کئچه آلتینا دؤشه یین، قره قویون یخنیسیندان اؤنونه گتیرین.ییرسه یئسین، یئمزسه دورسون گئتسین دئمیشدی. و...

 

البته بو نئچه ساده اؤرنک دیر. اعتراض ائدیب- بیزیم اخی قادینلار حاقدا آتامیزدان یاخشی سؤزلرده وار دییه بیر- بیرینیزین قولاغینا پیچیلداشاجاقسینیز. بیر آز درزوملو اولون. یئددی آیلیق اولمایین. باسدی دؤشونه صدفلی سازی آشیق آلدی دوباره :

 

سیز منه نمونه اولاراق بونو یازاجاقسینیز : آنا حاققی تانری حاققی دیر.

 

آتالار سؤزونده بوبارلیق اوچون بیرده نه اولسون بئله قادین سؤزجویونه راست گلمک ایمکانسیزدیر. ان چوخ ایشله دیلن تئرمینلر آرواد و آنا تئرمینی دیر.آرواد سؤزونون کوکو اوراقوت و اوروق سؤزوندندیر. توخوم بئجه رن، نسیل تؤره دن آنلامینا گلیر. ایندیسه گلک آنا سؤزونه گؤرک گئنه آشیق آۀدی نه دئدی دوباره.

 

بیز قادیندان همیشه آنالیغی یونتوب چیخارمیشیق،آنا اوشاق دوغماق اوچون اؤزل بیر پروسه محصولودور!آنالیق یعنی

 

دوغماق یئته نه یی بیولوژیک بیر اؤزللیکدیر.قادین دوغا بیلر.چون انسان آدلی بیر وارلیغین مونث(دیشی)واریانتیدیر.بس دوغماق یئته نه یی طبیعی اولاراق بوتون دیشی جانلی لارا عاییددیر.دئمه لی بیزلرده قادین کیملیگی اونون دوغماق یئته نه یی و بیولوژیک اؤزلیییله وورغولانیر.او زامان بیر سورو وار!آخیی حیوانلاردا دوغا بیبرلر؟اونلار دا بالالارینی امیزدیریر،بسله ییر.اونلار دا مقددس آنادیرلارمی؟آتالاریمیز اونو سادجه دوغوم مشینی کیمی،اونو استثمار ائدیب دوزلتدیگی دؤرد دووارین آراسینا سالدیقدان سونرا اونا آنا قوتساللیغی مئدالینی بوینونا بیوندوروغا سالیریق!

 

تورکون مثلی قادینی آلدادیبلار!سونرا بایاتیلار قوشوبلار،نغمه لر یازیبلار.اؤز حیاتینی اؤزگورجه یاشاماق ایسته ین قادینی ایسه ناموسسوز آدلاندیریبلار!دوغا بیلمه ینلره  ایسه ناقص،قیسیر،یاریمچیق دامغاسینی ووروبلار.اونون دوغماق کیمی دوغال اوزللیی اساس ماهیتینه چئوریلیب.فئودال گلنک لرینی قورویان اتالار بو میکروب دوشونجه نی چاغداشلاریمیزادا اؤتوروبلر!داییما اجتماعی-سیاسی تاریخیمیزدا اونولا اؤیوندویوموز،داشینی دؤشوموزه دؤیدویوموز مشروطیت انقلبیندادا بو فاجعه گلیر اؤز یئرینی تاپیر.بوووی!!!بو دئموکراتیک حرکت؟؟؟مشروطیتین تصویب ائتدیگی یاسادا دلی لرو قادینلار سَس وئرمه حاققیندان محروم اولورلار.ادبیاتیمیزدا ایسه بو میکروب دوشونجه طرزی اؤزونو درین قاتلاردا گیزله دیر.(بو دا یاری معاصر یاری سنتی عنعنه وی بیر محافظه کارلیقدان آسیلی دیر) منیم اؤزومون ده بعضی یازیلاریم  کئچمیشده ه ایکی آنلاملی آلینیبسا بورادان عذر ایسته ییرم.اگر اؤزومو قادین یئرینه قویا بیلسَم(ایمکانسیز)اؤزلرینی شعریمیزین تمللری سایان بوغو بورما شاعرلریمیزین دؤنه-دؤنه قارداش و بَی سؤزونو گؤرونجه نئجه ده اوره ییم بولانماز!بولانار(اوتانیم یئرینه آی بوغلو یازین ....)  

 

درد بیر دئییل ایکی دئئیل!آتا ارکلیگین آت چاپدیغی بیر اجتماعی بیلینچ آلتیندان تؤرنن کولتوردن چوخلاری تیپیک آذربایجانلی قادینی اولماق اوچون جان وئرسینلر. اونلارین آرزیلادیغی فانتازیا و رومانتیک دونیا مدرن و چاغداش دیرلره اویغون یاشاماق دئییل اصلینده دره لرده ساجدا چؤره ک یاپیب،11- قارین دوغماق. گئجه لر ارلرینین قاییش کؤته یینه وتجاووزونا اوغراماقدیر. 21- ینجی عصریده بونلاری آرزیلاماق یادا کئچمیش دییه اؤیونمک حیاسیزلیقدیر. چاغداش حیات سایاغینی پیسله ییب خاقانلارین آتا- ارکلیگین پادشاهلارین اؤلاد قتلینی حرمسرا مدنیتینی کؤله لیکله و قولدارلیق کولتورونو چوخ ائولیلیگی آرزیلاماق حیاسیزلیقدیر.

 

سونوج : قادینلارلا بئله دوشگون و ایره نج موناسیبت بسله ین کولتورون و ادبیاتین سونون نه دیر؟ بوغونا ادبیاتی قوربان کسدییم نیچه دئمیشکن "دئکادانس"

نوشته شده توسط اکبر زواری رضائی در 19:27 |  لینک ثابت   •